"جعجع عم يسمّع بري يلي ما عبالو يسمعو"!!

نشر موقع "IMLebanon" :

انتخابات 2026 شاغلة بال اللبنانيين والعالم كلو. الخارج عم يضغط لاجراء الانتخابات بموعدها فبحسب المبعوث الأميركي توم براك اذا صار حرب، لصالح الحزب تأجيل الانتخابات لأن أكيد رح يكون خسران عسكريا وبالتالي بحاجة لوقت ليرجع يرتب وضعو. يعني أميركا ما بدا تتأجل الانتخابات لضمان خسارة الحزب عسكريا وسياسيا من ميل ومن تاني ميل عم تحسب للفوضى يلي ممكن تسببا تأجيل الانتخابات من احتجاجات وفراغ حكومي وشل عمل المجلس النيابي.

عنجد بضحك براك قديش بيعتل هم رد فعل اللبنانيين على تقاعس السياسيين عن أداء عملن. نحنا حطلنا قنينة مي منلتهي فيا جمعة ومننسى المشاكل كلها.

على كل حال، رئيس حزب القوات اللبنانية سمير جعجع بعدو فاتح النار على الرئيس بري بملف الانتخابات. ومن بعد كلام براك قوا العيار وحكي لبري يلي غيرو ما سمعو إياه من 40 سنة لليوم : ” يلي بقرر بالمجلس النيابي هو الأكثرية النيابية، لا أنت، ولا أي شخص آخر”.

هلق جعجع منفعل لأن واصلو حكي عن لسان بري انو هوي جرب تصويت المغتربين قبل وكانت أول وآخر مرة ومش رح يعيدا لو قد ما علوا صوتن، على أساس الرئيس بري بيقدر يشلّح المغتربين جنسيتهم اللبنانية كمان!

بس بري نفى كمان عبر مصادر هيدا الحكي وطلع انو جعجع عم يألف حكي عن لسانو.

ولو هيك حكي بيتصدق؟ الرئيس بري فاتح المجلس وناطركن صرلو قدي لتعديل قانون الانتخاب مش هيك؟!
تنشوف آخرة هالمشادة التويترية لوين رح توصل. هل بيفتح الرئيس بري المجلس وبتم دراسة الاقتراح المقدم لتعديل قانون الانتخاب أو رح يضل نافي الصوت الاغترابي ودافن الاقتراحات باللجان ليضمن تعطيل الصوت السيادي الاغترابي ويحاول يقلّص عدد النواب السياديين؟!